“பண கஷ்டத்தால் அப்படி செய்தேன், இனி செய்ய மாட்டேன்” : கர்ணன் பட நடிகர் உறுதி!!

சூதாட்டம் நமக்கு மட்டுமின்றி நம்மை சேர்ந்தவர்களுக்கும் பாதிப்பை ஏற்படுத்தும். ஆனால் அண்மைக்காலமாக இந்த சூதாட்டம் ஆன்லைன் வழியாக பல மக்களின் வாழ்க்கைக்குள் நுழைந்துவிட்டது. இந்த ஆன்லைன் சூதாட்ட விளையாட்டால் பல மரணங்கள் நிகழ்ந்துள்ளன.

இதனால் தமிழ்நாடு அரசு தடை விதிக்க பல்வேறு தரப்பினரிடம் இருந்தும் கோரிக்கை எழுந்த நிலையில், இதற்கு தடை விதிப்பதற்காக ஏற்பாடுகளை தமிழ்நாடு அரசு மும்முரமாக செய்து வருகிறது.

இதனிடையே இது தொடர்பான விளம்பரத்தில் நடிக்க வேண்டாம் என்று இசையமைப்பாளரும், நடிகருமான ஜி.வி.பிரகாஷ் சக நடிகர்களுக்கு கோரிக்கை வைத்தார்.

இந்நிலையில், சண்டக்கோழி படத்தில் வில்லனாக நடித்து பிரபலமான நடிகர் லால், தான் ஆன்லைன் ரம்மி விளம்பரத்தில் நடித்து தவறு செய்து விட்டதாக வருத்தம் தெரிவித்துள்ளார்.

ஊரடங்கின்போது பணக்கஷ்டம் ஏற்பட்டதாகவும், அதனால் என்ன செய்வது என்று திகைத்து நின்று கொண்டிருந்த போது தான், ஆன்லைன் ரம்மி விளையாட்டு விளம்பரத்தில் நடிக்க அழைப்பு வந்தது எனவும் தெரிவித்துள்ளார்.

ஆனால் அதில் நடிப்பதற்கு அரசு அனுமதி வழங்கி இருப்பதாக எண்ணி, நடித்தேன். ஆனால் இந்த விளம்பரம் மூலம் இவ்வளவு பெரிய பிரச்னை வரும் என்றோ ரம்மி விளையாட்டு பலரை தற்கொலைக்கு கொண்டு செல்லும் என்றோ நினைக்கவில்லை.

ரம்மி விளையாட்டு விளம்பரத்தில் நடித்ததற்காக மிகவும் வருந்துகிறேன். இனிமேல் இதுபோன்ற விளம்பரங்களில் நடிக்க மாட்டேன் என்று அவர் தெரிவித்துள்ளார்.

newstm.in