இன்ஸ்டாகிராமுக்கு பதிலாக 'ரோஸ்கிராம்' செயலி அறிமுகம்..!!

ரஷ்யா - உக்ரைன் போர் காரணமாக உலக நாடுகள் பல்வேறு தடைகளை ரஷ்யாவுக்கு விதித்து உள்ளன. அதில் முக்கியமானவை அமெரிக்காவின் பண பட்டுவாடா நிறுவனங்களான விசா மற்றும் மாஸ்டர் கார்டு ஆகியவை ரஷ்யாவில் தங்களுடையை சேவையை நிறுத்தியது.இதனால் ரஷ்யாவில் இந்த கார்டுகளை பயன்படுத்தி பணம் எடுக்க முடியாத நிலை ரஷ்ய மக்களுக்கு ஏற்பட்டுள்ளது.

இந்நிலையில், ரஷ்யாவும் பல்வேறு நிறுவனங்கள், நாடுகள் மீது நடவடிக்கை எடுத்து வருகிறது. அந்த வகையில், ரஷ்ய ராணுவத்தினருக்கு எதிராக பதிவு செய்யப்படும் வன்முறைக் கருத்துக்களை அனுமதித்த இன்ஸ்டாகிராம் செயலியின் சேவையை முடக்குவதாக ரஷ்யா அறிவித்தது.

இதோடுமட்டுமல்லாமல் ஏற்கனவே, அமேசான் வர்த்தக நிறுவனம், பேஸ்புக், நெட்பிளிக்ஸ், சாம்சங், ஆப்பிள், சோனி, கூகுள், டிஸ்னி, யூனிவர்செல், டிக்டாக், INTEL, BMW, FORD, HONDA உள்ளிட்ட நிறுவனங்கள் ரஷ்யாவில் தங்கள் சேவையை நிறுத்தியுள்ளன.

இந்நிலையில், இன்ஸ்டாகிராமிற்கு பதிலாக ரஷிய தொழில்நுட்ப தொழில்முனைவோர் உள்நாட்டு சந்தையில் மார்ச் 28 அன்று கூடுதல் செயல்பாடுகளை கொண்ட 'ரோஸ்கிராம்' புகைப்பட பகிர்வு செயலியை அறிமுகப்படுத்த உள்ளனர்.

இதுகுறித்து, மக்கள் தொடர்பு இயக்குனர் அலெக்சாண்டர் கூறுகையில், "எனது நண்பரான கிரில் பிலிமோனோவ் மற்றும் எங்கள் டெவலப்பர்கள் குழு இந்த நிகழ்வுகளுக்கு ஏற்கனவே தயாராக இருந்தனர், மேலும் ரஷிய மக்களால் விரும்பப்படும் ஒரு பிரபலமான சமூக வலைப்பின்னலின் அனலாக்கை உருவாக்கும் வாய்ப்பை இழக்க வேண்டாம் என்று முடிவு செய்தனர்," எனக் கூறியுள்ளார்.