மூழ்கும் கப்பலான இங்கிலாந்து அணிக்கு புது கேப்டன்.. தொடக்கமே 2 கோரிக்கைகளுடன் ஆரம்பம் !

கடந்த 5 ஆண்டுகளாக இங்கிலாந்து டெஸ்ட் அணிக்கு கேப்டனாக இருந்து வந்த ஜோ ரூட், ஆஷஸ் தொடரில் 4-0 என்ற கணக்கில் தோல்வி அடைந்தது. அதற்கு முன்னதாகவும் சொந்த மண்ணில் இந்தியா, நியூசிலாந்து நாடுகளுக்கு எதிரான டெஸ்ட் தொடரையும் இங்கிலாந்து இழந்தது. இதனால் அந்த அணியும் கேப்டன் ஜோ ரூட்-ம் கடும் விமர்சனங்களை எதிர்கொண்டனர்.

மேலும் ஜோ ரூட்-ஐ கேப்டன் பதவியிலிருந்து நீக்க வேண்டும் என பலரும் கோரிக்கை விடுத்து வந்தனர். இந்நிலையில், கேப்டன் பதவியிலிருந்து அவராகவே விலகி, பேட்டிங்கில் கவனம் செலுத்த உள்ளேன் என ஜோ ரூட் சில திங்களுக்கு முன்பு அதிரடியாக அறிவித்தார்.

இதனைத் தொடர்ந்து புது கேப்டனை தேர்வு செய்யும் பணியில் இங்கிலாந்து கிரிக்கெட் வாரியம் தீவிரம் காட்டியது. அந்த அணியின் இயக்குநர் ராப் கீ தலைமையில் குழு ஒன்றும் அமைக்கப்பட்டது. அப்போது, இங்கிலாந்து டெஸ்ட் அணியில் நிரந்தர இடம் பிடித்தவர்களில் ஒருவரை டெஸ்ட் கேப்டனாக நியமிக்க வேண்டும் என ஒருமனதாக முடிவு செய்யப்பட்டது.

டெஸ்ட் அணியில் நிரந்தர இடம் பிடித்தவர்களில் முதன்மையானவராக இருப்பவர் பென் ஸ்டோக்ஸ்தான். இதனால், இவருக்குத்தான் இடம் கிடைக்கும் எனக் கூறப்பட்டது. இறுதியில் அவரையே நிர்வாகம் தேர்வு செய்துள்ளது. இவர் இங்கிலாந்து அணியின் 81ஆவது டெஸ்ட் கேப்டன் ஆவார்.

பென் ஸ்டோக்ஸ் நியமனம் குறித்து கருத்து தெரிவித்துள்ள அந்த அணியின் இயக்குநர் ராப் கீ, பென் ஸ்டோக்ஸை கேப்டனாக நியமிக்க, எங்களுக்கு எவ்வித தயக்கமும் ஏற்படவில்லை. முழு சம்மதத்துடன்தான் அவருக்கு கேப்டன் பதவியை வழங்குகிறோம். கூடுதல் பொறுப்பை ஏற்றுக்கொள்ள முன்வந்துள்ள பென் ஸ்டோக்ஸுக்கு நன்றி. இவரது தலைமையில் அணி பன்மடங்கு வளர்ச்சியடையும் என்ற நம்பிக்கை இருக்கிறது, எனக் கூறினார்.

இங்கிலாந்து அணி கடைசி 17 போட்டிகளில் ஒரேயொரு வெற்றியை மட்டுமே பெற்றுள்ளது. முதல்முறையாக, தொடர்ச்சியாக 5 தொடர்களில் வெற்றிபெறவில்லை. உலக டெஸ்ட் சாம்பியன்ஷிப் 2021-2023 புள்ளிப்பட்டியலில் கடைசி இடத்தில் நீடித்து வருகிறது. இப்படிப்பட்ட இக்கட்டான நிலையில்தான் பென் ஸ்டோக்ஸ் கேப்டன் பதவியை ஏற்றுள்ளார்.

இந்நிலையில் பென் ஸ்டோக்ஸ் நிர்வாத்திற்கு இரண்டு கோரிக்கைகளை முன் வைத்துள்ளதாக தகவல் வெளியாகியுள்ளது. அதில் முதன்மையானது, எக்காரணம் கொண்டும் எனது அனுமதியில்லாமல் ஆண்டர்சன், பிராட் ஆகியோரை அணியிலிருந்து நீக்க கூடாது என்ற கோரிக்கையும், அடுத்து என்னுடைய முடிவில் அணி நிர்வாகம் தலையிடக் கூடாது என்ற கோரிக்கையும் ஸ்டோக்ஸ் முன்வைத்திருக்கிறார். இதனை, அணி நிர்வாகம் ஏற்றுக்கொண்டதால்தான், ஸ்டோக்ஸ் கேப்டன் பதவியை ஏற்க ஒப்புதல் தெரிவித்ததாக தகவல் வெளியாகியுள்ளது.

newstm.in