எம்.கே.தியாகராஜ பாகவதர் பேரனுக்கு முதல்வர் ஸ்டாலின் நிதி உதவி..!!

மறைந்த பழம்பெரும் நடிகர் எம்.கே.தியாகராஜ பாகவதர் தயாரிப்பாளர், கர்நாடக இசைப் பாடகர் என பன்முக திறமைகளைக் கொண்டிருந்தார். வெறும் 14 படங்கள் தான் நடித்துள்ளார். ஆனால் பல தலைமுறைகளை தாண்டியும் அவரது பெயர் நிலைத்திருக்கிறது என்றால் அவர் படைத்த சாதனைகளே அதற்கு காரணம்.

அவர் நடித்த 14 படங்களில் 10 படங்கள் வசூலில் சாதனை படைத்தன. 'ஹரிதாஸ்', திரைப்படம் தொடர்ந்து 3 ஆண்டுகள் தியேட்டரில் ஓடி அந்த காலத்திலே சாதனை படைத்தது. புகழின் உச்சி, செல்வ செழிப்போடு இருந்தவ அவர் தனது 49 வயதில் மரணமடைந்தார். அதன் பிறகு அவரது குடும்பத்தின் நிலை மாறி போனது. தலைமுறைகள் வெவ்வேறு திசைகளில் வெவ்வேறு தொழில் சார்ந்து நகர்ந்து போனார்கள்.

இந்தநிலையில், எம்.கே.தியாகராஜ பாகவதரின் மகள் வயிற்றுப் பேரன் சாய்ராம் நேற்று முதல்வரின் தனிப்பிரிவில் மனு ஒன்று அளித்தார். அதில், 'எனது தாத்தா எம்.கே.தியாகராஜ பாகவதருக்கு 2 மனைவிகள் இருந்தனர். 2ஆவது மனைவி ராஜம்மாள். அவர்களின் மகள் அமிர்தலட்சுமி - பாஸ்கர் ஆகிய தம்பதியின் மகன் நான். எனக்கு அண்ணன், தம்பி, தங்கை உள்ளனர். நாங்கள் 4 பேரும் சிறு வயதில் இருக்கும்போதே அப்பா இறந்துவிட்டார். அம்மாவும் இல்லை. பாட்டிதான் எங்களை வளர்த்தார்.

தற்போது எங்கள் குடும்பத்தினர் மிகவும் கஷ்டத்தில் உள்ளனர். அனைவருமே சூளைமேட்டில் உள்ள அண்ணண் வீட்டில் வசிக்கிறோம். மிகுந்த பணக் கஷ்டத்தில் இருக்கிறோம். தங்கையின் கணவரும் இறந்துவிட்டார். நான் புகைப்பட கலைஞராகவும், வீடியோ படம் பிடிப்பவராகவும் இருந்தேன். அந்த உபகரணங்களை வாடகைக்கு எடுத்து தொழில் செய்து வந்தேன். இந்த நிலையில் கொரோனா தொற்று பரவல் காரணமாக நானும் எங்கள் குடும்பத்தினரும் வேலையையும் இழந்துவிட்டோம். நான் செக்யூரிட்டி மற்றும் சமையல் வேலைகளுக்குச் சென்று வருகிறேன்.

எங்களால் வீட்டிற்கு வாடகை கொடுக்க முடியவில்லை. எனவே வீட்டு வசதி வாரியத்தில் அரசு எங்களுக்கு ஒரு வீட்டை ஒதுக்கினால் அனைவருமே அங்கேயே வசிப்போம். எங்கள் வாழ்க்கைக்கு அது பேருதவியாக அமையும் என்று கூறியிருந்தார். இந்த தகவல் வெளியாகி எம்.கே.தியாகராஜ பாகவதரின் ரசிகர்கள் பெரும் அதிர்ச்சி அடைந்தனர். திரையுலகின் முடிசூடா மன்னனின் தலைமுறைகளுக்கு இப்படி ஒரு நிலையா என்று பலரும் சோகத்தில் மூழ்கினர்.

இந்நிலையில், எம்.கே.தியாகராஜ பாகவதர் பேரனுக்கு ரூ.5 லட்சம் நிதி உதவி வழங்கப்படும் என முதல்வர் ஸ்டாலின் அறிவிப்பு வெளியிட்டுள்ளார். மேலும், வீட்டு வசதி வாரிய குடியிருப்பில் குறைந்த வாடகையில் வீடு ஒதுக்கவும் முதல்வர் உத்தரவு பிறப்பித்துள்ளார்.