மாணவர்களுக்கு குட் நியூஸ்.. தேர்வு விதி நீக்கம்.. சுப்ரீம் கோர்ட் புதிய உத்தரவு..!

கொரோனா பரவல் காரணமாக கடந்த ஆண்டு பிளஸ் 2 தேர்வை சிபிஎஸ்இ எனும் மத்திய இடைநிலைக் கல்வி வாரியம் நடத்தவில்லை. பத்தாம் வகுப்பு, பிளஸ் 1 தேர்வுகளிலும், பிளஸ் 2 செய்முறை மற்றும் உள் மதிப்பீட்டிலும் பெற்ற மதிப்பெண்கள் அடிப்படையில் மாணவர்களின் தேர்ச்சி அறிவிக்கப்பட்டது.

இந்நிலையில், தேர்ச்சி பெற்ற 34 ஆயிரத்து 317 பிளஸ் 2 மாணவர்கள் கூடுதல் மதிப்பெண்கள் பெறுவதற்காக இரண்டாவது முறை தேர்வு எழுதினர். அவர்களில் 11 பேர் சார்பில் உச்சநீதிமன்றத்தில் மனு தாக்கல் செய்யப்பட்டுள்ளது.

அந்த மனுவில், ‘பிளஸ் 2 இறுதி தேர்ச்சிக்கு இரண்டாவது எழுதிய தேர்வில் பெற்ற மதிப்பெண்கள்தான் தேர்ச்சியை நிர்ணயிக்கும் என சிபிஎஸ்இ தெரிவித்துள்ளது.

அவ்வாறு இல்லாமல் இரண்டாவது தேர்வை விட முதல் தேர்வில் கூடுதல் மதிப்பெண்கள் பெற்றிருந்தால், அதன் அடிப்படையில் தேர்ச்சியை அறிவிக்க சிபிஎஸ்இ-க்கு உத்தரவிட வேண்டும்’ எனக் கூறப்பட்டிருந்தது.

இந்த மனு உச்ச நீதிமன்ற நீதிபதி ஏ.எம்.கன்வில்கர் தலைமையிலான அமர்வு முன் விசாரணைக்கு வந்தது. அப்போது நீதிபதிகள் அளித்த தீர்ப்பு: இரு தேர்வுகளில் எதில் அதிக மதிப்பெண்கள் பெற்றுள்ளனரோ அதை தேர்வு செய்யும் வாய்ப்பை மாணவர்களுக்கு வழங்க வேண்டும்.

இரண்டாவது தேர்வில் பெற்ற மதிப்பெண்கள் அடிப்படையில்தான் தேர்ச்சி என்ற விதிமுறையை சிபிஎஸ்இ நீக்க வேண்டும்” என்று நீதிபதிகள் தீர்ப்பளித்தனர்.