நடிகர் துல்கர் சல்மான் வாங்கிய கார் இத்தனை கோடியா..?

மலையாள திரைப்படங்களில் தனது திரை வாழ்வை தொடங்கி, பின்னர் தமிழ், தெலுங்கு, ஹிந்தி மொழிகளில் நடித்து புகழ் பெற்றவர் துல்கர் சல்மான்.

கேரள சூப்பர் ஸ்டார் மம்முட்டியின் மகனான இவர் சமீபத்தில் தனது 35 வது பிறந்தநாளை கொண்டாடினார். அதையொட்டி, அவர் அடுத்து நடிக்கவுள்ள படங்களின் போஸ்டர்கள் வெளியாகின.

அதில் குறிப்பாக, பெயரிடப்படாத தெலுங்கு படத்தில் லெப்டினன்ட் ராம் எனும் ராணுவ வீரர் வேடத்தில் நடிக்கிறார். இந்தப் படத்தை ஹனு ராகவபுடி இயக்குகிறார். கீர்த்தி சுரேஷின் ‘மகாநதி’ படத்தில் ஜெமினி கணேசனாக நடித்த பிறகு தெலுங்கில் துல்கரின் இரண்டாவது படம் இதுவாகும். இதில் துல்கருக்கு ஜோடியாக மிருணாள் தாகூர் நடிக்கிறார். அத்துடன், ‘ஓதிரம் கடக்கம்’, ‘கிங் ஆப் கோத்தா’ போன்ற படங்களின் முதல் லுக் போஸ்டரும் அன்று வெளிவந்தது.

அதே வேளை, துல்கர் சல்மான் திருடனாக நடித்து மிகவும் எதிர்பார்க்கப்பட்ட வாழ்க்கை வரலாற்று க்ரைம் த்ரில்லர் படமான ‘குருப்’ ரிலீசுக்கு தயாராக உள்ளது. இந்தப் படத்தில் மனோஜ் பாஜ்பாய், சோபிதா துலிபாலா, இந்திரஜித் சுகுமாரன், சன்னி வெய்ன், ஷைன் டாம் சாக்கோ ஆகியோர் நடித்துள்ளனர். இதுதவிர, துல்கர் போலீசாக நடித்துள்ள மலையாள ஆக்‌ஷன் த்ரில்லர் படமான ‘சல்யூட்’ மற்றும் தமிழ் படமான ‘ஹே சினாமிகா’ ஆகியவை அடுத்தடுத்து வெளியாக உள்ளன.

இந்நிலையில் துல்கர் சல்மான், Mercedes-AMG G 63 FL எனும் விலை உயர்ந்த சொகுசு கார் வாங்கியுள்ளார். இதை, அந்தக் கார் தயாரிப்பு நிறுவனம் அதிகாரப்பூர்வமாக தனது முகநூல் பக்கத்தில் வெளியிட்டுள்ளது.

இந்தக் கார் இந்திய மதிப்பில் சுமார் 2.50 கோடியாகும். 96 லிட்டர் பெட்ரோல் கொள்ளளவுடன், 8 கிலோமீட்டர் மைலேஜில் மணிக்கு 220 கிலோமீட்டர் வேகத்தில் செல்லும். வெறும் 5 வினாடிகளில் 100 கி.மீ வேகத்தை அடையும். மேலும் இந்த வாகனம் குண்டு துளைக்காத Bullet Proofing செய்யப்பட்டது.

துல்கர் சல்மான் திரையுலகிற்கு வருவதற்கு முன்பே கார் விற்பனை தொழிலில் ஈடுபட்டு வந்தார் என்பது குறிப்பிடத்தக்கது.