சேவை கட்டணம் வசூலிக்கக்கூடாது.. ஹோட்டல்களுக்கு புது ரூல்ஸ் !

ஹோட்டல்களும், உணவகங்களும் கட்டாயமாக சேவைக் கட்டணம் வசூலித்து வருவதாகவும், சில உணவகங்கள் மிக அதிக சேவைக் கட்டணம் வசூலிப்பதாகவும் புகார் எழுந்தது. சட்டப்படி சேவைக் கட்டணம் என்பது சேவைகளால் ஈர்க்கப்பட்ட ஒரு வாடிக்கையாளர் தாமாக விரும்பி செலுத்தும் ஒரு கட்டணம்தானே தவிர கட்டாயமாக செலுத்தப்பட வேண்டியதில்லை. ஆனால் பல உணவகங்களில் பில்லில் சேவைக் கட்டணம் சேர்த்து வசூலிக்கின்றன.

இதுகுறித்து புகார்கள் அதிகரித்ததை தொடர்ந்து உணவகங்கள் கட்டாயமாக சேவைக் கட்டணம் வசூலிக்கக்கூடாது என மத்திய அரசு அறிவுறுத்தியது. இந்நிலையில், சேவைக் கட்டணம் மற்றும் அதுதொடர்பாக புகார் தெரிவிப்பது குறித்து மத்திய அரசு இன்று வழிமுறைகளை அறிவித்துள்ளது.
இதன்படி, அனைத்து ஹோட்டல்களும், உணவகங்களும் பில்லில் சேவைக் கட்டணம் சேர்த்து வசூலிக்கக்கூடாது. வேறு எந்தவொரு மாற்று பெயர்களிலும் சேவைக் கட்டணம் வசூலிக்கக்கூடாது.

ஒரு வாடிக்கையாளர் கட்டாயமாக சேவைக் கட்டணம் செலுத்த வேண்டும் என ஹோட்டல்களும், உணவகங்களும் வற்புறுத்தக்கூடாது. வாடிக்கையாளர் முழுக்க முழுக்க தாமாக விரும்பி செலுத்துவதுதான் சேவைக் கட்டணம் என்பதை ஹோட்டல்கள், உணவகங்கள் தெளிவாக தெரிவிக்க வேண்டும்.

சேவைக் கட்டணம் அடிப்படையில் வாடிக்கையாளர் ஹோட்டல் அல்லது உணவகத்துக்குள் நுழைய தடை விதிக்கக்கூடாது. உணவுக்கான மொத்த பில் கட்டணத்துடன் சேவைக் கட்டணமும் சேர்த்து, ஒட்டுமொத்த கட்டணத்துக்கு ஜிஎஸ்டியும் சேர்த்து வசூலிக்கக்கூடாது.

விதிமுறைகளை மீறி ஏதேனும் உணவகங்கள், ஹோட்டல்கள் சேவைக் கட்டணம் வசூலித்தால், பில் கட்டணத்தில் இருந்து சேவைக் கட்டணத்தை நீக்கும்படி சம்பந்தப்பட்ட ஹோட்டல் அல்லது உணவகத்துக்கு வாடிக்கையாளர் அறிவுறுத்தலாம்.

இதையும் மீறி சேவைக் கட்டணம் வசூலித்தால் தேசிய நுகர்வோர் உதவி எண்ணை (National Consumer Helpline) தொடர்புகொண்டு புகார் தெரிவிக்கலாம். 1800-11-4000 என்பது தேசிய நுகர்வோர் உதவி எண். இதுபோக 1915 எண்ணை தொடர்புகொண்டும் புகார் பதிவு செய்யலாம். அல்லது NCH மொபைல் ஆப் வாயிலாகவும் புகார் தெரிவிக்கலாம். நுகர்வோர் ஆணையத்திடம் நேரடியாகவும் புகார் தெரிவிக்கலாம்.

newstm.in