அசத்தல் பாலிசி திட்டம்.. ஒரே பிரீமியம் கட்டினால் வாழ்நாள் முழுவதும் பென்சன் வரும் !!

ஒவ்வொருவருக்கும் வயது ஆக ஆக இறுதிக் காலத்தில் தங்களை யார் கவனித்துக்கொள்வார்கள் என்ற பயம் அதிகரித்துக் கொண்டே இருக்கும். ஆனால், பென்சன் என்ற பெயரில் இறுதிக் காலத்தில் ஒரு நிலையான தொகை வந்துகொண்டிருந்தால் இந்த பயமே தேவையில்லை. அதற்காகத்தான் சம்பாதிக்கும் காலத்திலேயே ஏதேனும் பென்சன் திட்டத்தில் சேர்ந்து பணத்தைப் போட்டுவைத்தால் நல்லது. இதனை பலரும் திட்டமிட்டு கொள்வர். ஆனால் பெரும்பாலானோர் தவறவிட்டுவிடுவர்.

தற்போது பயனாளர்கள் வருமானத்துக்கு ஏற்ப பென்சன் திட்டங்கள் அதிகளவில் இருக்கின்றன. ஒவ்வொரு மாதமும் பிரீமியம் செலுத்தி பென்சன் வாங்கும் திட்டமும் உள்ளது. ஒரே பிரீமியம் செலுத்தி பென்சன் வாங்கும் திட்டமும் நிறைய இருக்கின்றன. அப்படிப்பட்ட ஒரு திட்டம்தான் எல்.ஐ.சி. சரல் பென்சன் திட்டம்.

இந்த பாலிசியை வாங்கினால் ஒரே ஒரு முறை பிரீமியம் செலுத்தினாலே போதும். வாழ்நாள் முழுதும் பென்சன் பணம் தொடர்ச்சியாக வந்துகொண்டே இருக்கும்.

இந்த சரல் பென்சன் திட்டத்தில் இரண்டு வசதிகள் உள்ளன. முதல் வசதியில் பாலிசிதாரர் உயிரோடு இருக்கும் வரையில் அவருக்கு பென்சன் கிடைக்கும். அவர் இறந்தபின்னர் அவரது நாமினிக்கு அடிப்படை பிரீமியம் தொகை வழங்கப்படும். இரண்டாவது வசதியில் கணவன் - மனைவி இருவரில் யார் கடைசி வரை உயிரோடு இருக்கிறார்களோ அவர்களுக்கு பென்சன் தொகை கிடைக்கும். பாலிசிதாரர் இறந்தபின்னரும் அதே பென்சன் தொகை அவரது வாழ்க்கை துணையின் இறுதிக் காலம் வரை கிடைத்துக் கொண்டே இருக்கும். இருவருமே இறந்தபின்னர் நாமினிக்கு அடிப்படை பிரீமியம் தொகை வழங்கப்படும்.

இந்த பாலிசியை ஆன்லைன் மூலமாகவும் வாங்கலாம். 40 முதல் 80 வயது வரை உள்ளவர்கள் இந்த பாலிசியை வாங்கலாம். ஒவ்வொரு மாதமும் பென்சன் வரவேண்டும் என்று விரும்பினால் ஒரு மாதத்துக்கு 1000 ரூபாய் என்ற அளவில் பிரீமியம் செலுத்தியிருக்க வேண்டும். காலாண்டு அடிப்படையில் பென்சன் வாங்க நினைத்தால் ஒரு மாதத்துக்கு 3,000 ரூபாய் என்ற அளவில் பிரீமியம் செலுத்த வேண்டும்.

newstm.in