உலகக்கோப்பை டி 20: முதல் போட்டியிலே அசத்திய ஓமன் !! 10 விக்கெட் வித்தியாசத்தில் அபார வெற்றி !!

20 ஓவர் உலக கோப்பை கிரிக்கெட் தொடரின் முதல் சுற்று போட்டிகள் இன்று தொடங்கின. இந்த சுற்றில் பங்கேற்றுள்ள 8 அணிகள் 2 பிரிவாக பிரிக்கப்பட்டு லீக் சுற்றில் மோதுகின்றன. முதல் நாளான இன்று மஸ்கட்டில் இரண்டு லீக் ஆட்டங்கள் நடக்கின்றன. இதில் முதல் ஆட்டத்தில், 'பி' பிரிவில் இடம்பெற்றுள்ள ஓமன்- பப்புவா நியூ கினியா அணிகள் மோதின.

டாஸ் வென்ற ஓமன் அணி பீல்டிங்கை தேர்வு செய்தது. அதன்படி பப்புவா நியூ கினியா அணி முதலில் பேட்டிங் செய்தது. அணியின் தொடக்க வீரர்கள் டோனி உரா, லீகா சியாகா இருவரும் ரன் எதுவும் எடுக்காமல் ஆட்டமிழந்தனர். அதன்பின்னர் களமிறங்கிய பேட்ஸ்மேன்கள், அதிரடியாக ஆடி ரன் குவித்தனர். குறிப்பாக ஓமன் பந்துவீச்சை சிதறடித்த கேப்டன் ஆசாத் வாலா 56 ரன்கள் குவித்தார். சார்லஸ் அமினி 37 ரன்கள் சேர்த்தார்.

மற்ற வீரர்கள் பெரியளவில் ரன் சேர்க்காததால், அதன்பின்னர் விக்கெட்டுகள் மளமளவெனச் சரிந்தன. இதனால் 20 ஓவர் முடிவில் பப்புவா நியூ கினியா அணி, 9 விக்கெட் இழப்பிற்கு 129 ரன்கள் சேர்த்தது. ஓமன் தரப்பில் சீஷன் மக்சூத் 4 விக்கெட்டுகளை கைப்பற்றினார்.

இதையடுத்து 130 ரன்கள் எடுத்தால் வெற்றி என்ற இலக்குடன் ஓமன் அணி களமிறங்கியது. தொடக்க வீரர்கள் அகிப் இல்யாஸ், ஜதிந்தர் சிங் ஆகியோர் அதிரடியாக ஆடி பப்புவா நியூ கினியா பந்துவீச்சை துவம்சம் செய்தனர். பந்துவீச்சாளர்கள் மாறி மாறி புதிய யுக்திகளை கையாண்டும் இந்த ஜோடியை பிரிக்க முடியவில்லை. இருவரும் கடைசி வரை ஆட்டமிழக்காமல் 38 பந்துகள் மீதமிருந்த நிலையில் வெற்றியை உறுதி செய்தனர்.

ஜதிந்தர் சிங் 42 பந்துகளில் 7 பவுண்டரி, 4 சிக்சர்களுடன் 73 ரன்கள் விளாசினார். அகிப் இல்யாஸ் 43 பந்துகளில் 5 பவுண்டரி ஒரு சிக்கருடன் 50 ரன்கள் சேர்த்தார். இதன்மூலம் நடப்பு உலகக் கோப்பை தொடரில் முதல் வெற்றியை ஓமன் பதிவு செய்துள்ளது.

newstm.in