#BREAKING: குரூப்-2, 2ஏ தேர்வுகளுக்கான அறிவிப்பாணை வெளியீடு..!

தமிழக அரசின் பல்வேறு துறைகளுக்கு தேவையான அலுவலர்கள் தமிழ்நாடு அரசுப் பணியாளர் தேர்வாணையம் (டிஎன்பிஎஸ்சி) மூலம் தேர்வு செய்யப்பட்டு வருகின்றனர்.

இதன் மூலம், போட்டித் தேர்வுகள் மற்றும் நேர்காணல் தேர்வுகள் ஆகியவற்றை டிஎன்பிஎஸ்சி நடத்தி வருகிறது.

இந்நிலையில், குரூப்-2 பணிக்கு 116 பணியிடங்களுக்கும், குரூப்-2ஏ பணிக்கு 5412 பணியிடங்களுக்கு இன்று முதல் விண்ணப்பிக்கலாம் என்று தேர்வாணையம் சார்பில் கடந்த 18ம் தேதி தெரிவிக்கப்பட்டது. இந்நிலையில், அதற்கான அறிவிப்பாணை இன்று வெளியிடப்பட்டுள்ளது.

இதில், குரூப்-2 பிரிவில் இந்த முறை காவல்துறை பிரிவின் கீழ் சிறப்பு பிரிவு அதிகாரிக்கான பதவி சேர்க்கப்பட்டுள்ளது. மேலும், கடந்த 2 ஆண்டுகளாக தேர்வு நடத்தப்படாததால், இந்த முறை வயது வரம்பு 32 ஆக உயர்த்தப்பட்டுள்ளது குறிப்பிடத்தக்கது.

இதற்கு விண்ணப்பிக்க விரும்புவோர், 23-02-2022 முதல் 23-03-2022 வரை www.tnpsc.gov.in, www.tnpscexams.in என்ற தேர்வாணையத்தின் இணையதளம் மூலம் விண்ணப்பிக்கலாம் என்றும், இதற்கான முதல் நிலை தேர்வு மே 21-ம் தேதி நடத்தப்படும் என்றும் தேர்வாணையம் தெரிவித்துள்ளது.