வரும் 11-ம் தேதி பொதுவிடுமுறை.. ராமநாதபுரம் எம்பி முதல்வருக்கு கோரிக்கை..!

“பக்ரீத் பண்டிகைக்கு மறுநாள் பொது விடுமுறை அளிக்க வேண்டும்” என, ராமநாதபுரம் எம்பி தமிழக முதல்வருக்கு கோரிக்கை விடுத்துள்ளார்.

இதுகுறித்து, ராமநாதபுரம் நாடாளுமன்ற உறுப்பினர் கே.நவாஸ்கனி, தமிழக முதல்வர் மு.க.ஸ்டாலினுக்கு விடுத்துள்ள அறிக்கையில், “வருகிற10-ம் தேதி (ஞாயிற்றுக்கிழமை) பக்ரீத் பண்டிகை கொண்டாடப்படுகிறது. பல்வேறு பணிகள் நிமித்தம் வெளியூர்களில் வசிக்கும் பெரும்பாலானோர் தங்கள் சொந்த ஊர்களுக்குச் சென்று பக்ரீத் பண்டிகை கொண்டாடுவது வழக்கம்.

அப்படி வெளியூர்களுக்குச் செல்பவர்கள் மீண்டும் அவர்கள் தங்கியுள்ள ஊர்களுக்கு திரும்பும் வகையில் மறுநாளான 11-ம் தேதி (திங்கட்கிழமை) தமிழகம் முழுவதும் உள்ள பள்ளி, கல்லூரி உள்ளிட்ட நிறுவனங்களுக்கு பொது விடுமுறை அளித்தால் அவர்களின் சிரமம் குறையும்.

எனவே, பக்ரீத் பண்டிகையின் மறுநாளான 11-ம் தேதி பொது விடுமுறை அளிக்க தமிழக முதல்வர் பரிசீலனை செய்து நடவடிக்கை எடுக்குமாறு அன்புடன் கேட்டுக் கொள்கிறேன்” எனக் கூறியுள்ளார்.