சூப்பர்.. சிறுவர்களுக்கான கொரோனா தடுப்பூசி விலை ரூ.900-ல் இருந்து ரூ.225 ஆக குறைப்பு

சிறார்களுக்கான கோவாவாக்ஸ் தடுப்பூசியின் விலையை சீரம் நிறுவனம் ரூ.900-லிருந்து ரூ.225 ஆகக் குறைத்துள்ளது.

மகாராஷ்டிராவின் புனே நகரில் இயங்கி வரும் சீரம் நிறுவனம், கோவிஷீல்டு என்ற பெயரில் கொரோனா தடுப்பூசியை தயாரித்து இந்தியாவுக்கு வழங்குகிறது. இந்த தடுப்பூசி தற்போது நாடு முழுவதும் 18 வயதுக்கு மேற்பட்டோருக்கு செலுத்தப்படுகிறது. 

இந்த சூழலில் இந்நிறுவனம் தற்போது 12 முதல் 17 வயது வரையிலான சிறார்களுக்கு கோவாவாக்ஸ் என்ற பெயரில் கொரோனா தடுப்பூசி தயாரித்துள்ளது. இந்த தடுப்பூசிக்கு மத்திய அரசு அண்மையில் அனுமதி வழங்கியது.

இதையடுத்து, மத்திய அரசு கொரோனா தடுப்பூசி திட்டத்துக்காக தொடங்கியுள்ள கோவின்இணையதளத்தில் கோவாவாக்ஸ் கடந்த 2ஆம் தேதி சேர்க்கப்பட்டது. இதனிடையே, கோவாவாக்ஸ் தடுப்பூசி இந்திய சந்தையில் விற்பனைக்கு கிடைக்கும் என சீரம் நிறுவன தலைவர் அதார் பூனவாலா அண்மையில் ட்விட்டரில் பதிவிட்டிருந்தார்.

இந்நிலையில், தனியார் மருத்துவமனைகளுக்கு கோவாவாக்ஸ் மருந்தின் விலையை ரூ.900-லிருந்து ரூ.225 (ஜிஎஸ்டி தனி) ஆக குறைத்துள்ளதாக சீரம் நிறுவன உயர் அதிகாரி பிரகாஷ் குமார் சிங் தெரிவித்துள்ளார். மேலும் மருந்து விலையுடன் சேவைக் கட்டணமாக ரூ.150 வசூலிக்க அனுமதி வழங்கப்பட்டுள்ளதாகவும் அவர் தெரிவித்துள்ளார்.

இப்போது 12 முதல் 14 வயதுக்குட்பட்டோருக்கு பயலாஜிகல் இ நிறுவனத்தின் கார்ப்வேக்ஸும் 15 முதல் 18 வயதுக்குட்பட்டோருக்கு பாரத் பயோடெக் நிறுவனத்தின் கோவாக்சினும் அரசு முகாம்களில் இலவசமாக செலுத்தப்படுகிறது. தனியார் மருத்துவமனைகளில் கோவாக்சின் ரூ.386-க்கும் கார்ப்வேக்ஸ் ரூ.990-க்கும் செலுத்தப்படுகிறது என்பது குறிப்பிடத்தக்கது.

newstm.in