கழிவறைக்குள் கட்டுவிரியன்.. அலறியடித்து ஓடிய மாணவர்கள்.. லாவகமாக பிடித்த ஆசிரியர்..!

தென்காசி மாவட்டம் சங்கரன்கோவில் அருகே உள்ள குருவிகுளம் கோபால் நாயக்கர் அரசு மேல்நிலைப் பள்ளியில் ஆயிரத்துக்கும் அதிகமான மாணவ - மாணவியர் பயின்று வருகின்றனர்.

இந்நிலையில், மாணவர்கள் பள்ளி வளாகத்தில் உள்ள கழிவறைக்கு சென்றபோது, தண்ணீர் குழாய் பகுதியில் கட்டுவிரியன் பாம்பு ஒன்று இருந்துள்ளது.

இதைப் பார்த்து அதிர்ச்சி அடைந்து ஓடிய மாணவர்கள், இதுகுறித்து உடற்கல்வி ஆசிரியர் நேருதாஸ் கென்னடியிடம் தெரிவித்தனர்.

​​​கழிவறைக்குள் சென்ற அவர், குச்சியின் உதவியுடன் பாம்பை வெளியே வர வைத்து லாவகமாக மீட்டு காட்டுப்பகுதிக்குள் கொண்டு விட்டார்.

இதேபோல கடந்த 10 தினங்களுக்கு முன்பு பள்ளிக்குள் புகுந்த 6 அடி நீளமுள்ள சாரை பாம்பை பிடித்து, அதையும் காட்டுப்பகுதிக்குள் கொண்டு விட்டார் என்பது குறிப்பிடத்தக்கது.

பள்ளி வளாகத்திற்குள் பாம்பு புகுந்த நிலையில், யாரையும் எதிர்பார்க்காமல் உடற்கல்வி ஆசிரியர் இது போன்ற பணிகளில் ஈடுபட்டது சக ஆசிரியர்கள் மற்றும் மாணவ - மாணவிகள் மத்தியில் வரவேற்பை பெற்றதுடன் உடற்கல்வி ஆசிரியருக்கு பாராட்டுகளை தெரிவித்து வருகின்றனர்.