ஆவின் பால் விலை மேலும் தள்ளுபடி.. தமிழக அரசு முக்கிய அறிவிப்பு! !

திமுக தேர்தல் அறிக்கையிலேயே ஆவின் பால் விலை குறைக்கப்படும் என வாக்குறுதி அளிக்கப்பட்டது. அதன்படி முதலமைச்சராக மு.க.ஸ்டாலின் பதவியேற்ற பிறகு, அவரது உத்தரவின்பேரில் கடந்த மே 16ஆம் தேதி ஆவின் பால் விலை லிட்டர் ஒன்றுக்கு ரூ.3 குறைக்கப்பட்டது. இந்த விலைக்குறைப்புக்கு பின் ஆவின் பால் சராசரியாக நாள் ஒன்றுக்கு 2 லட்சம் லிட்டர் விற்பனை அதிகரித்துள்ளது.

ஆவினின் அடையாளமாக பொதுமக்களுக்கு அதிகபட்ச விலையில் இருந்து மேலும் குறைத்து சலுகை விலையில் பால் அட்டை மூலம் விற்பனை செய்யப்பட்டு வருகிறது. அதன் விவரம் கீழ்கண்டவாறு:

சமன்படுத்தப்பட்ட பால் (நீலம்) :
அதிகபட்ச விற்பனை விலை லிட்டருக்கு 40 ரூபாய்
பால் அட்டை விற்பனை விலை லிட்டருக்கு 37 ரூபாய்

நிலைப்படுத்தப்பட்ட பால் (பச்சை):
அதிகபட்ச விற்பனை விலை லிட்டருக்கு 44 ரூபாய்
பால் அட்டை விற்பனை விலை லிட்டருக்கு 42 ரூபாய்

நிறை கொழுப்பு பால் (ஆரஞ்சு):
அதிகபட்ச விற்பனை விலை லிட்டருக்கு 48 ரூபாய்
பால் அட்டை விற்பனை விலை லிட்டருக்கு 46 ரூபாய் என உள்ளது.

தற்போது வரை சென்னையில் சுமார் 6 லட்சம் குடும்பங்கள் பிரதி மாதம் பால் அட்டையை சலுகை விலையில் (மாதம் லிட்டர் ஒன்றுக்கு ரூ.60 முதல் ரூ.90 வரை சேமிப்பு) பெற்று பயனடைந்து வருகின்றனர். மேலும் அனைத்து பொது மக்களும் இத்தகைய சலுகையை பெற ஜனவரி மாதம் முழுவதும் ஆவின் வட்டார அலுவலகங்கள், பால் நுகர்வோர்கள் கூட்டுறவு சங்கங்கள் மற்றும் ஆவின் அதிநவீன பாலகங்கள் மூலம் விண்ணப்பங்கள் வழங்கப்படுகிறது.

ஆவின் பால் அட்டையை பெற ஏதேனும் ஒரு அடையாள அட்டையை விண்ணப்பத்துடன் சேர்த்து சமர்ப்பிக்கும் பட்சத்தில் உடனடியாக பால் அட்டை வழங்கப்படும். இந்த நிலையில், பாலகங்களில் சமர்ப்பிக்கப்படும் விண்ணப்பங்களுக்கு மட்டும் மறுநாள் ஆவின் வட்டார அலுவலர்கள் மூலம் பால் அட்டை வழங்கப்படும். மேலும், இணையதளம் வாயிலாகவும் புதிய பால் அட்டைகளை பெற்றுக் கொள்ளலாம். www.aavin.tn.gov.in & www.aavinmilk.com
இந்த சலுகை பால் அட்டை பொது மக்களுக்கு மட்டுமே வழங்கப்படும் எந்தவொரு தனியார் நிறுவனங்களுக்கும் வழங்கப்படாது என தமிழக அரசு தெரிவித்துள்ளது.

newstm.in