இயக்குனர் ஷங்கர் மகள் கிரிக்கெட் வீரர் ரோகித்தை கரம்பிடித்தார்.. முதல்வர் மு.க.ஸ்டாலின் நேரில் வாழ்த்து !!

திரைப்பட இயக்குநர் ஷங்கரின் மகள் திருமணத்திற்கு நேரில் சென்று முதலமைச்சர் மு.க. ஸ்டாலின் வாழ்த்து தெரிவித்தார்.

தமிழகத்தின் பிரபல திரைப்பட இயக்குனர் ஷங்கர். இவர் பிரமாண்ட இயக்குநர் எனவும் அழைக்கப்படுகிறார். இந்த நிலையில் இவரின் மூத்த மகள் ஐஸ்வர்யாவின் திருமணம் சென்னையில் இன்று நடைபெற்றது. இளம் கிரிக்கெட் வீரரும் டி.என்.பி.எல்-லில் விளையாடும் மதுரை பாந்தர்ஸ் அணி உரிமையாளரின் மகனுமான ரோகித்தை ஐஸ்வர்யா திருமணம் செய்து கொண்டார். 

இவர்களது திருமணம் சென்னை கிழக்கு கடற்கரை சாலையில் உள்ள நட்சத்திர விடுதியில் நடைபெற்றது. கொரோனா அச்சுறுத்தல் காரணமாக மணமகள் மற்றும் மணமகனின் நெருங்கிய உறவினர்கள் மற்றும் ஒரு சில முக்கிய பிரபலங்கள் மட்டும் இதில் கலந்துகொண்டனர். குறிப்பாக தமிழக முதல்வரும், திமுக தலைவருமான மு.க.ஸ்டாலின் நேரில் சென்று மணமக்களை வாழ்த்தினார். 

அவருடன் சுகாதாரத்துறை அமைச்சர் மா.சுப்பிரமணியம் மற்றும் நடிகரும், திமுக எம்.எல்.ஏ.வுமான உதயநிதி ஸ்டாலினும் உடனிருந்தனர். கொரோனா பரவல் குறைந்த பின்னர் வரவேற்பு நிகழ்ச்சியை பிரம்மாண்டமாக நடத்த இயக்குனர் ஷங்கர் திட்டமிட்டுள்ளார். திருமணம் தொடர்பான புகைப்படங்கள் வைரலாகி பலரும் வாழ்த்து கூறி வருகின்றனர்.

newstm.in