இந்தியாவில் மொத்தம் எத்தனை ஏடிஎம் மையங்கள் இருக்கின்றன? ஒரு சிறிய விளக்கம் !

நாடு முழுவதும் டிஜிட்டல் பணப்பரிவர்த்தனை அதிகரித்து வருகிறது. ஏடிஎம் மையங்களுக்கு சென்று பணம் எடுப்பதும் சிறிய அளவில் குறைந்து வருவதாக கூறப்படுகிறது. எனினும் மக்கள் தேவை இருப்பதால் ஏடிஎம் மையங்கள் நகரங்கள், கிராமங்களில் அதிகளவில் அடுத்தடுத்து அமைக்கப்பட்டு வருகிறது.

இந்த நிலையில், நாட்டில் ஒட்டுமொத்தமாக எத்தனை ஏடிஎம் எனப்படும் தானியங்கி பணப்பட்டுவாடா மையங்கள் இருக்கின்றன என்பது குறித்து  நாடாளுமன்றத்தில் இன்று மத்திய நிதி இணையமைச்சர் தகவல் தெரிவித்துள்ளார்.

அதாவது, நாடாளுமன்றத்தின் மக்களவையில் இது குறித்து எழுப்பப்பட்ட கேள்விக்கு மத்திய நிதித் துறை இணையமைச்சர் பகவத் கரத் எழுத்துப்பூர்வமாக பதிலளித்தார். அதில், 2021ஆம் ஆண்டு செப்டம்பர் மாதம் வரையிலான காலக்கட்டத்தில் நாடு முழுவதும் 2.13 லட்சம் ஏடிஎம் மையங்கள் செயல்பட்டு வருகின்றன.

இவற்றில் 47 சதவீதத்துக்கும் அதிகமானவை, கிராம மற்றும் புறநகர்ப் பகுதிகளில் இயங்கி வருகின்றன என்றும் தெரிவிக்கப்பட்டுள்ளது. அது மட்டுமல்லாமல், கூடுதலாக எந்த வங்கியையும் சாராமல், வெறும் ஏடிஎம் இயந்திரங்களும் நாடு முழுவதும் அமைக்கப்பட்டு வருகின்றன. இதுவரை 27,837 ஏடிஎம் இயந்திரங்கள் இவ்வாறு அமைக்கப்பட்டுள்ளதாகவும் தெரிவிக்கப்பட்டுள்ளது.

newstm.in