மெட்டாவெர்ஸ் தொழில்நுட்பத்தில் திருமண வரவேற்பு.. கிருஷ்ணகிரி இளைஞர் அசத்தல் ஐடியா..!

கிருஷ்ணகிரியில் பிப்ரவரி மாதம் திருமணம் செய்துகொள்ள இருக்கும் தினேஷ், ஜனகநந்தினி ஜோடி, தங்களது திருமண வரவேற்பை மெட்டாவெர்ஸ் (Metaverse) எனும் தொழில்நுட்பம் மூலமாக நடத்த திட்டமிட்டுள்ளனர்.

தமிழகத்தின் கிருஷ்ணகிரி மாவட்டத்தில் உள்ள சிவலிங்கபுரம் கிராமத்தைச் சேர்ந்த தினேஷ் - ஜனகநந்தினி ஆகியோர் பிப்ரவரி 6-ம் தேதி திருமணம் செய்துகொள்ள உள்ளனர். திருமண வரவேற்பு நிகழ்வை புதுமையுடன் நடத்த தொழில்நுட்ப வல்லுநரான மாப்பிள்ளை தினேஷ் திட்டமிட்டிருக்கிறார். அவரது ஆசையை தனது வருங்கால மனைவியிடம் கூறவே, அங்கிருந்தும் அவருக்கு கிரீன் சிக்னல் கிடைத்துள்ளது.

திருமணம் முடிந்த பின்னர் மேகக் கணினி தொழில்நுட்பத்தின் உதவியுடன், உலகின் அனைத்து மூலை, முடுக்குகளிலும் இருக்கும் நண்பர்களை ஒருங்கிணைத்து வரவேற்பு நிகழ்வை நடத்த திட்டமிடப்பட்டுள்ளது. கொரோனா பெருந்தொற்று காலத்தில் உள்ள தடங்கல்களை போக்கும் வகையில் இந்த அறிவிப்பு அமைந்துள்ளது.

இது புதிய தொழில்நுட்ப கால திருமண நிகழ்வின் தொடக்கமாக இருக்கும் என்று நெட்டிசன்கள் முணுமுணுத்து வருகின்றனர். மார்க் சக்கர்பெர்க், சத்ய நாடெல்லா போன்ற பெரும் டெக் நிறுவன தலைவர்களின் கனவை மெய்பிக்கும் விதமாக, இந்த திருமண வரவேற்பு அழைப்பிதழ் உருவாக்கப்பட்டுள்ளது.

மெட்டாவெர்ஸ் என்றால் என்னவென்று எளிதாகக் கூற வேண்டும் என்றால், இந்த தொழில்நுட்பத்தின் மூலம், நீங்கள் இணையத்தில் துணி வாங்க வேண்டும் என்று நினைக்கிறீர்கள். ஆனால், அளவுகள் சரியாக இருக்குமா என்ற சந்தேகம் எப்போது எழும். இந்த தொழில்நுட்பம் மெய்நிகர், முப்பரிமாண தோற்றம் ஆகியவற்றை ஒருங்கிணைத்து செயல்படும். எனவே, நீங்கள் வாங்கும் துணியை அணிந்து, அது சரியாக உள்ளதா, உங்களுக்கு ஏற்றதாக இருக்கிறதா என்பதை கண்கூடாக பார்த்து இருக்கும் இடத்தில் இருந்தே வாங்க முடியும்.

தற்போது நடைபெற இருக்கும் திருமணம் வரவேற்பு நிகழ்வும் அப்படிதான். இவர்கள் இருக்கும் இடம் மேகக்கணினி முறையில் முப்பரிமாண தோற்றத்துடன் காட்சிப்படுத்தப்படும். கொடுக்கப்படும் இணைப்பில் உள்ளவர்கள் இதற்கான கருவிகள் உதவியுடன் நேரடியாக நிகழ்வில் கலந்துகொண்ட உணர்வை அனுபவிக்கலாம். இன்னும் உங்களுக்கு சந்தேகம் இருந்தால், திரைப்பட நடிகர் சூர்யா நடிப்பில் வெளிவந்த ‘அஞ்சான்’ திரைப்படத்தின் கிளைமேக்ஸ் சீனை ஒரு முறை பார்த்துவிட்டு வாருங்கள். அனைத்தும் எளிதில் விளங்கிவிடும்.

இது குறித்து மணமகன் தினேஷ் கூறும்போது, “மெட்டாவேர்ஸ் திருமண வரவேற்பை நடத்த வேண்டும் என்ற எண்ணத்தை, எனது வருங்கால மனைவியிடம் கூறினேன். அந்த யோசனை அவருக்கும் பிடித்திருந்தது. ஹாரி பாட்டர் கதைகளில் வருவதைப் போல் மிகப் பிரமாண்ட கட்டடங்களை வடிவமைத்து Hogwarts School of Witchcraft and Wizardry இடத்தில் இருந்து இந்த நிகழ்வை இயக்க திட்டமிடப்பட்டுள்ளது.

நான் பல ஆண்டுகளாக கிரிப்டோவில் முதலீடு செய்து வருகிறேன். பிளாக்செயின் தொழில்நுட்பம் குறித்து ஆய்வுகளையும் மேற்கொண்டு வருகிறேன். கடந்த ஒரு வருடமாக எத்திரியம் கிரிப்டோ காயினை மைனிங் செய்து வருகிறேன். பிளாக்செயின் என்பது மெட்டாவெர்ஸின் அடிப்படை தொழில்நுட்பம் என்பதால், எனது திருமணம் நிச்சயிக்கப்பட்டதும், மெட்டாவேர்ஸ் தொழில்நுட்பம் வாயிலாக வரவேற்பு நிகழ்வை நடத்த நினைத்தேன்.

மெட்டாவர்ஸ் என்பது மெய்நிகர் (Virtual Reality) உலகமாகும். அதை பயன்படுத்துபவர்கள் டிஜிட்டல் அவதாரங்கள் மூலம் வாழவும் மற்றவர்களுடன் தொடர்பு கொள்ளவும் முடியும். எனது திருமண வரவேற்பு எப்படி இருக்கும் என்பதைக் காட்ட ஒரு சிறிய காணொளியை ட்விட்டரில் பகிர்ந்துள்ளேன். அதில் 'இந்தியாவின் முதல் மெட்டாவேர்ஸ் திருமணம்' எனப் பதிவிட்டுள்ளேன்” என்று கூறியுள்ளார்.